चंद्राबाबूंच्या रॅलीत पुन्हा चेंगराचेंगरी; 3 ठार, अनेक जखमी; काय आहे प्रकरण?

गुंटूर, 1 जानेवारी : आंध्र प्रदेशचे माजी मुख्यमंत्री आणि तेलुगु देसम पक्षाच्या रॅलीत रविवारी चेंगराचेंगरी झाली. या घटनेत तिघांचा मृत्यू झाला असून अनेकजण जखमी झाले आहेत. गुंटूर जिल्ह्याचे एसपी आरिफ हाफिज यांनी सांगितले की, माजी मुख्यमंत्री चंद्राबाबू नायडू देखील टीडीपीच्या या रॅलीत सहभागी झाले होते. रॅलीत अचानक चेंगराचेंगरी होऊन तिघांचा मृत्यू झाला. जखमींना उपचारासाठी स्थानिक रुग्णालयात दाखल करण्यात आले आहे.

अलीकडेच एन चंद्राबाबू नायडू यांच्या जाहीर सभेदरम्यान नेल्लोरमध्ये झालेल्या चेंगराचेंगरीत 8 जणांचा मृत्यू झाला होता. चंद्राबाबू नायडू यांची रॅली गुंटूरमधील विकास नगरमध्ये पोहोचल्याचे सांगण्यात येत आहे. येथे संक्रांती भेट कार्यक्रमाचे आयोजन करण्यात आले होते. यादरम्यान चेंगराचेंगरी झाली.

आंध्र प्रदेशातील नेल्लोर जिल्ह्यातील कंदुकूर येथे टीडीपी प्रमुख चंद्राबाबू नायडू यांच्या रोड शोदरम्यान झालेल्या चेंगराचेंगरीत सात जण ठार झाले. माजी मुख्यमंत्र्यांच्या रोड शोमध्ये मोठी गर्दी झाली होती आणि या घटनेत 6 जण जखमीही झाले होते. आंध्र प्रदेशच्या राजकारणात पुन्हा एकदा पुनरागमन करण्यासाठी उत्सुक असलेल्या चंद्राबाबूंच्या रोड शोमध्ये मोठ्या संख्येने लोक जमले होते. रोड शो दरम्यान झालेल्या जाहीर सभेत मोठ्या प्रमाणात गर्दी झाल्याने चेंगराचेंगरीची परिस्थिती निर्माण झाली असून त्यात 7 जणांना आपला जीव गमवावा लागला आहे.

वाचा – महाराष्ट्रानंतर आणखी एका राज्यात ‘ऑपरेशन लोटस’? भाजपच्या मोठ्या नेत्याचा दावा

मृतांच्या नातेवाईकांना 10 लाख रुपयांची आर्थिक मदत

आंध्रचे माजी मुख्यमंत्री चंद्राबाबू यांनी या वेदनादायक घटनेबद्दल शोक व्यक्त केला आणि मृतांच्या नातेवाईकांना प्रत्येकी 10 लाख रुपयांची आर्थिक मदत जाहीर केली. कंदुकूर येथील ईडेमी खरमा कार्यक्रमांतर्गत एनटीआर सर्कलमध्ये सुरू असलेल्या कार्यक्रमादरम्यान ही घटना घडली. वृत्तानुसार, कंदुकूरमध्ये गुदमरून एकाचा मृत्यू झाला तर दुसऱ्याचा बाजूच्या कालव्यात पडून मृत्यू झाला. याशिवाय जाहीर सभेत सहभागी असलेल्या आणखी 5 जणांना आपला जीव गमवावा लागला.

चंद्राबाबू नायडू जखमींना पाहण्यासाठी रुग्णालयात पोहोचले

अनेक जखमींवर जवळच्या रुग्णालयात उपचार सुरू आहेत. चंद्राबाबू नायडू यांनी रुग्णालयात जाऊन जखमींच्या प्रकृतीची विचारपूस केली. या अपघातात एकूण 6 जण जखमी झाल्याचे सांगण्यात येत असून, त्यांची प्रकृती स्थिर आहे.